ನವದೆಹಲಿ; ದೇಶದ ಬಾಹ್ಯಾಕಾಶ ಕ್ಷೇತ್ರವನ್ನು ಖಾಸಗಿ ಕಂಪನಿಗಳಿಗೆ ಮುಕ್ತಗೊಳಿಸಿದ ಆರು ವರ್ಷಗಳ ಬಳಿಕ, ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO)ಯ ಭವಿಷ್ಯದ ಪಾತ್ರ ಮತ್ತು ಸಾವಿರಾರು ಉದ್ಯೋಗಿಗಳ ಭವಿಷ್ಯದ ಕುರಿತು ಆತಂಕ ವ್ಯಕ್ತವಾಗಿದೆ. ಇಸ್ರೋದ ಉತ್ಪಾದನೆ ಹಾಗೂ ಕಾರ್ಯಾಚರಣೆಗೆ ಸಂಬಂಧಿಸಿದ ಚಟುವಟಿಕೆಗಳನ್ನು ಖಾಸಗಿ ವಲಯಕ್ಕೆ ವರ್ಗಾಯಿಸುವ ಕುರಿತು ಸ್ಪಷ್ಟನೆ ನೀಡುವಂತೆ ಇಸ್ರೋದ ವಿವಿಧ ಕೇಂದ್ರಗಳ ಒಂಬತ್ತು ಉದ್ಯೋಗಿ ಸಂಘಟನೆಗಳು ಇಸ್ರೋ ಅಧ್ಯಕ್ಷ ಹಾಗೂ ಬಾಹ್ಯಾಕಾಶ ಇಲಾಖೆ ಕಾರ್ಯದರ್ಶಿ ವಿ. ನಾರಾಯಣನ್ ಅವರಿಗೆ ಮನವಿ ಸಲ್ಲಿಸಿವೆ.

ಸೆಪ್ಟೆಂಬರ್ 4ರಂದು ಬರೆದ ಪತ್ರದಲ್ಲಿ, ಸರಕಾರದ ಖಾಸಗೀಕರಣ ನೀತಿ, ಇಸ್ರೋದ ಮುಂದಿನ ಪಾತ್ರ, ಹಾಲಿ ಸಿಬ್ಬಂದಿಯ ಸೇವಾ ಭದ್ರತೆ ಹಾಗೂ ಭವಿಷ್ಯದ ನೇಮಕಾತಿಗಳ ಮೇಲೆ ಉಂಟಾಗಬಹುದಾದ ಪರಿಣಾಮಗಳ ಕುರಿತು ಅಧಿಕೃತ ಮಾಹಿತಿ ನೀಡುವಂತೆ ಸಂಘಗಳು ಒತ್ತಾಯಿಸಿವೆ. ಇಸ್ರೋದ ಹಲವು ಕೇಂದ್ರಗಳ ಸಿಬ್ಬಂದಿ ಸಂಘಟನೆಗಳು ಈ ಪತ್ರಕ್ಕೆ ಸಹಿ ಹಾಕಿದ್ದು, ಖಾಸಗೀಕರಣಕ್ಕೆ ಸಂಬಂಧಿಸಿದ ಅಧಿಕೃತ ನೀತಿ ಹಾಗೂ ಜಾರಿಯ ಹಂತಗಳ ಬಗ್ಗೆ ಸಿಬ್ಬಂದಿಗೆ ಸ್ಪಷ್ಟ ಮಾಹಿತಿ ನೀಡಿಲ್ಲ ಎಂದು ಆರೋಪಿಸಿವೆ.

ಇನ್-ಸ್ಪೇಸ್ ಅಧ್ಯಕ್ಷ ಪವನ್ ಕುಮಾರ್ ಗೋಯೆಂಕಾ ಅವರ ಇತ್ತೀಚಿನ ಹೇಳಿಕೆಯ ಬಳಿಕ ಉದ್ಯೋಗಿ ಸಂಘಟನೆಗಳ ಆತಂಕ ಹೆಚ್ಚಾಗಿದೆ. ಮುಂದಿನ ದಿನಗಳಲ್ಲಿ ಇಸ್ರೋ ಸ್ವತಃ ಉಡಾವಣಾ ವಾಹನಗಳನ್ನು ತಯಾರಿಸುವುದಿಲ್ಲ ಮತ್ತು ಈ ಜವಾಬ್ದಾರಿಯನ್ನು ಖಾಸಗಿ ವಲಯ ಅಥವಾ ಸಾರ್ವಜನಿಕ ವಲಯದ ಉದ್ಯಮಗಳಿಗೆ ನೀಡಲಾಗುವುದು ಎಂದು ಅವರು ಹೇಳಿದ್ದರು. ಈ ಪ್ರಕ್ರಿಯೆ SSLV ಮೂಲಕ ಆರಂಭವಾಗಿದ್ದು, ಮುಂದಿನ ದಿನಗಳಲ್ಲಿ PSLV ಮತ್ತು LVM3 ಉತ್ಪಾದನೆಗೂ ವಿಸ್ತರಿಸುವ ಸಾಧ್ಯತೆ ಇದೆ ಎಂದು ಹೇಳಲಾಗಿದೆ.

ಇಸ್ರೋ ಉಡಾವಣಾ ವಾಹನ ಮತ್ತು ಉಪಗ್ರಹ ಉತ್ಪಾದನಾ ಚಟುವಟಿಕೆಗಳಿಂದ ಹಿಂದೆ ಸರಿದರೆ, ಹಾಲಿ ಉದ್ಯೋಗಿಗಳು ಹಾಗೂ ಭವಿಷ್ಯದ ನೇಮಕಾತಿಗಳ ಮೇಲೆ ಪರಿಣಾಮ ಬೀರುವ ಆತಂಕವಿದೆ ಎಂದು ಸಂಘಟನೆಗಳು ತಿಳಿಸಿವೆ. ಸಂಶೋಧನೆಯ ಬಳಿಕ ನಡೆಯುವ ಪ್ರಯೋಗಗಳು ಮತ್ತು ಆಂತರಿಕ ತಾಂತ್ರಿಕ ಕಾರ್ಯಗಳು ಕುಗ್ಗುವ ಸಾಧ್ಯತೆಯಿದ್ದು, ಸಿಬ್ಬಂದಿ ಬಲ, ಬಡ್ತಿ ಹಾಗೂ ಕೌಶಲ್ಯಾಭಿವೃದ್ಧಿ ಅವಕಾಶಗಳ ಮೇಲೂ ಪರಿಣಾಮ ಉಂಟಾಗಬಹುದು ಎಂದು ಅವು ಎಚ್ಚರಿಸಿವೆ.

ಉಡಾವಣಾ ವಾಹನಗಳ ವಿನ್ಯಾಸ, ನಿರ್ಮಾಣ, ಏಕೀಕರಣ, ಪರೀಕ್ಷೆ ಮತ್ತು ಉಡಾವಣಾ ಕಾರ್ಯಾಚರಣೆಗಳನ್ನು ಕೇವಲ ‘ಉತ್ಪಾದನಾ ಒಪ್ಪಂದ’ ಎಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದು ಸಂಘಗಳು ಸ್ಪಷ್ಟಪಡಿಸಿವೆ. ಇವು ಇಸ್ರೋದ ಪ್ರಮುಖ ತಾಂತ್ರಿಕ ಸಾಮರ್ಥ್ಯ, ಸಾಂಸ್ಥಿಕ ಅನುಭವ ಮತ್ತು ದೇಶದ ಕಾರ್ಯತಂತ್ರದ ಶಕ್ತಿಯ ಭಾಗವಾಗಿದ್ದು, ಪ್ರಮುಖ ಚಟುವಟಿಕೆಗಳನ್ನು ಖಾಸಗಿ ವಲಯಕ್ಕೆ ವರ್ಗಾಯಿಸುವ ಕುರಿತು ಸ್ಪಷ್ಟ ನೀತಿ, ಕಾನೂನು ಮತ್ತು ಆಡಳಿತಾತ್ಮಕ ಆಧಾರದ ಬಗ್ಗೆ ಅಧಿಕೃತ ಮಾಹಿತಿ ನೀಡಬೇಕು ಎಂದು ಒತ್ತಾಯಿಸಿವೆ.