ಮುಂಬೈ: ಕೋಟ್ಯಂತರ ರೂಪಾಯಿ ಆಸ್ತಿ ಹೊಂದಿರುವ BJP ಶಾಸಕರೊಬ್ಬರು ಒಂದು ದಿನ ಭಿಕ್ಷುಕನ ವೇಷ ಧರಿಸಿ ಮುಂಬೈನ ಬೀದಿಗಳಲ್ಲಿ ಭಿಕ್ಷೆ ಬೇಡಿದ ಘಟನೆ ಗಮನ ಸೆಳೆದಿದೆ. ಮುಂಬೈನ ಘಾಟ್‌ಕೋಪರ್ ಪೂರ್ವ ಕ್ಷೇತ್ರದ ಬಿಜೆಪಿ ಶಾಸಕ ಪರಾಗ್ ಶಾ ಅವರು ತಮ್ಮ ಆಧ್ಯಾತ್ಮಿಕ ಗುರುವಿನ ಸಲಹೆಯಂತೆ ಈ ವಿಶಿಷ್ಟ ಅನುಭವವನ್ನು ಪಡೆದಿದ್ದಾರೆ.
ಪರಾಗ್ ಶಾ ಅವರು ದೇಶದ ಶ್ರೀಮಂತ ರಾಜಕಾರಣಿಗಳಲ್ಲಿ ಒಬ್ಬರಾಗಿದ್ದು, ಅವರ ಒಟ್ಟು ಆಸ್ತಿ ಮೌಲ್ಯ ಸುಮಾರು ₹5,000 ಕೋಟಿ ಎಂದು ಹೇಳಲಾಗಿದೆ. ಸಾಮಾನ್ಯವಾಗಿ ಐಷಾರಾಮಿ ಜೀವನ ನಡೆಸುವ ಅವರು, ಜೈನ ಧರ್ಮದ ಚಾತುರ್ಮಾಸದ ಸಂದರ್ಭದಲ್ಲಿ ತಮ್ಮ ಐಷಾರಾಮಿ ಕಾರುಗಳು, ಭದ್ರತಾ ವ್ಯವಸ್ಥೆ ಸೇರಿದಂತೆ ಹಲವು ಸೌಲಭ್ಯಗಳನ್ನು ಒಂದು ದಿನದ ಮಟ್ಟಿಗೆ ಬದಿಗಿಟ್ಟು ಭಿಕ್ಷುಕನ ವೇಷ ಧರಿಸಿದ್ದರು.
ಆಧ್ಯಾತ್ಮಿಕ ಗುರು ನಮ್ರಮುನಿ ಮಹಾರಾಜ್ ಅವರ ಸಲಹೆಯ ಮೇರೆಗೆ ಶಾ ಅವರು ಘಾಟ್‌ಕೋಪರ್‌ನ ಬೀದಿಗಳಲ್ಲಿ ಭಿಕ್ಷುಕನಂತೆ ಅಲೆದಾಡಿದರು. ಮೇಕಪ್ ಮಾಡಿಕೊಂಡು ವೇಷ ಬದಲಿಸಿಕೊಂಡ ಅವರು ಜನರ ಬಳಿ ಭಿಕ್ಷೆ ಬೇಡಿದರು, ಅಲ್ಲೇ ಊಟ ಮಾಡಿದರು. ಈ ವೇಳೆ ಬಿಸಿಲು, ಹವಾಮಾನದ ವೈಪರೀತ್ಯ, ದೈಹಿಕ ಶ್ರಮ ಹಾಗೂ ದಾರಿಹೋಕರ ಮಾತು ಸೇರಿದಂತೆ ಭಿಕ್ಷುಕರು ಎದುರಿಸುವ ಹಲವು ಕಷ್ಟಗಳನ್ನು ನೇರವಾಗಿ ಅನುಭವಿಸಿದರು.
“ಅದು ನನ್ನ ಗುರುವಿನ ಆದೇಶವಾಗಿದ್ದರಿಂದ ನಾನು ಒಂದು ದಿನ ಭಿಕ್ಷುಕನ ವೇಷದಲ್ಲಿ ಘಾಟ್‌ಕೋಪರ್‌ನಲ್ಲಿ ಅಲೆದೆ. ನನ್ನ ಗುರುಗಳು ಹೇಳಿದ್ದೆಲ್ಲವೂ ನನ್ನ ಒಳಿತಿಗಾಗಿಯೇ ಇರಬೇಕು” ಎಂದು ಪರಾಗ್ ಶಾ ಹೇಳಿದ್ದಾರೆ. ಹಣ, ಖ್ಯಾತಿ ಮತ್ತು ಅಧಿಕಾರದಿಂದ ವ್ಯಕ್ತಿಯಲ್ಲಿ ಅಹಂಕಾರ ಮೂಡಬಹುದು. ಈ ಅನುಭವವು ತಮ್ಮಲ್ಲಿನ ಅಹಂಕಾರವನ್ನು ಕಡಿಮೆ ಮಾಡಿ ವಿನಮ್ರತೆಯ ಮಹತ್ವವನ್ನು ಅರಿಯಲು ಸಹಾಯ ಮಾಡಿತು ಎಂದು ಅವರು ತಿಳಿಸಿದ್ದಾರೆ.
ಈ ವೇಳೆ ನಡೆದ ಎರಡು ಘಟನೆಗಳು ತಮ್ಮನ್ನು ಆಳವಾಗಿ ಕಾಡಿದವು ಎಂದು ಶಾ ಹೇಳಿದ್ದಾರೆ. “ನಾನು ಭಿಕ್ಷುಕನ ವೇಷದಲ್ಲಿ ನನ್ನದೇ ಅಪಾರ್ಟ್‌ಮೆಂಟ್ ಸಂಕೀರ್ಣಕ್ಕೆ ಹೋದಾಗ, ನನ್ನದೇ ಕಾವಲುಗಾರ ನನ್ನನ್ನು ಹೊರಗೆ ಕಳುಹಿಸಿದ. ಮತ್ತೊಂದೆಡೆ, ಜನರಿಗೆ ಸದಾ ಸಹಾಯ ಮಾಡುವ ನನ್ನ ಸ್ನೇಹಿತನೊಬ್ಬನ ಬಳಿಗೆ ಇದೇ ವೇಷದಲ್ಲಿ ಹೋದಾಗ, ಆತ ಕೂಡ ನನ್ನನ್ನು ಓಡಿಸಿದ” ಎಂದು ಅವರು ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.
ಈ ಘಟನೆಗಳಿಂದ ಜನರು ಕೆಲವೊಮ್ಮೆ ವ್ಯಕ್ತಿಗಿಂತ ಆತನ ಹಣ, ಹುದ್ದೆ ಮತ್ತು ಅಧಿಕಾರಕ್ಕೆ ಹೆಚ್ಚಿನ ಮೌಲ್ಯ ನೀಡುತ್ತಾರೆ ಎಂಬ ಕಠಿಣ ಪಾಠ ಕಲಿತಿದ್ದಾಗಿ ಶಾ ಹೇಳಿದ್ದಾರೆ. ಆದರೆ ಎಲ್ಲ ಅನುಭವಗಳೂ ನಕಾರಾತ್ಮಕವಾಗಿರಲಿಲ್ಲ. “ಮುಂಬೈನಲ್ಲಿ ಮಾನವೀಯತೆ ಇನ್ನೂ ಜೀವಂತವಾಗಿದೆ. ನನ್ನ ಪರಿಸ್ಥಿತಿಯನ್ನು ಕಂಡು ಕೆಲ ಯುವಕರು ಮರುಗಿ ₹20 ನೀಡಿದರು” ಎಂದು ಅವರು ಹೇಳಿದ್ದಾರೆ.
ನಂತರ ಭಿಕ್ಷುಕನ ವೇಷವನ್ನು ತೆಗೆದುಹಾಕಿದ ಪರಾಗ್ ಶಾ, ತಾವು ಭಿಕ್ಷುಕನಾಗಿ ಭೇಟಿ ನೀಡಿದ್ದ ಅದೇ ಸ್ಥಳಗಳಿಗೆ ಮತ್ತೆ ತೆರಳಿದರು. ಅಲ್ಲಿನ ಜನರನ್ನು ಭೇಟಿ ಮಾಡಿ ಅವರೊಂದಿಗೆ ಮಾತನಾಡಿ, ಬಡವರು ಹಾಗೂ ನಿರ್ಗತಿಕರು ಎದುರಿಸುವ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳಲು ಪ್ರಯತ್ನಿಸಿದರು. ಈ ಒಂದು ದಿನದ ಅನುಭವವು ತಮ್ಮ ಜೀವನದ ದೃಷ್ಟಿಕೋನದಲ್ಲಿ ಮಹತ್ವದ ಬದಲಾವಣೆ ತಂದಿದೆ ಎಂದು ಅವರು ಹೇಳಿದ್ದಾರೆ.
